ಬೆಳಕಿಂಡಿ

ಜಗಕೆಲ್ಲ ಅವನೊಬ್ಬ ಹುಚ್ಚ!
ಕ್ಯಾಮರಾ ಹಿಡಿದು ಕಂಡ ಕಂಡದ್ದೆಲ್ಲ  ಕ್ಲಿಕ್ಕಿಸುವ ಹುಚ್ಚ.
ಗುಡ್ಡ-ಬೆಟ್ಟ, ಪ್ರಾಣಿ-ಪಕ್ಷಿ, ಕ್ರಿಮಿ-ಕೀಟಗಳಾದಿ
ಸಜೀವ-ನಿರ್ಜೀವ ಎಲ್ಲವೂ ಅವನಿಗೆ ಒಂದೇ 
ಎಲ್ಲ ಅವನ ಛಾಯಾಚಿತ್ರದ ವಸ್ತು; ಸನ್ನೆ-ಮಾತಾಡುವ ಜೊತೆಯಂತೆ.
ಬಗಲಲ್ಲೇ ಜೊತೆಯಾಗಿ, ನಡೆದಲ್ಲಿ ಹಿತವಾಗಿ ನಗುವಾಗುವ ಚಿತ್ತ-ಚಿತ್ರ 
ಅದಕ್ಕೇ ಅವನೊಬ್ಬ ಹುಚ್ಚ! ಜಗದ ಕಣ್ಣಿಗೆ ಹುಚ್ಚ!!





ನಯನಗಳು ಕಂಡ ಮನ ಆಸ್ವಾದಿಸಿದ ಎಲ್ಲವನು
ಅಷ್ಟೇ ನೈಜವಾಗಿ ತನ್ನ ಕ್ಯಾಮರಾ ಕಣ್ಣಲಿ 
ಸೆರೆಹಿಡಿದು ಕೂಡಿಸಬೇಕೆನ್ನುವ ಬಹು ಹುಚ್ಚು.
ಅದು ಅವನಿಗೂ ಗೊತ್ತು!? ದೇವನ ಮಸೂರಕ್ಕೆ 
ಸಮವಿಲ್ಲ; ಅದು ಕಲೆ ಇಲ್ಲದ ನೇರ ದರ್ಪಣ.
ಛಲ ಬತ್ತಿಲ್ಲ, ಆದರವನ ಹೋರಾಟ ಎಂದೂ ನಿಂತಿಲ್ಲ 
ಅದಕ್ಕೇ ಅವನೊಬ್ಬ ಹುಚ್ಚ! ಜಗದ ಕಣ್ಣಿಗೆ ಹುಚ್ಚ!!




ಹರಿವ ನೀರಿನ ಅಡಿಯ ಕಲ್ಲದು- ಪಚ್ಚೆ ಹವಳ 
ಲಕ್ಷಿಸದ ಹೊಸ ಚಿಗುರು ಅವನಿಗೆ ನವಜೀವ(ನ)ದ ಸ್ಫೂರ್ತಿ 
ಅತೀ ಸಾಮಾನ್ಯ; ಅವನಿಗದು ಅಪರೂಪ, ಆಶ್ಚರ್ಯ!
ರಂಗಾಗಿಸಲು ಹಳೆಯ ಭಿತ್ತಿ, ತೋರಣವು ಕಸದ ಪಲ್ಲಕ್ಕಿ 
ನವಿಲುಗರಿಯಲಿ ಹುಡುಕಿ ಕಾಮನಬಿಲ್ಲು, ಬಣ್ಣದೋಕುಳಿ 
ಒಲವು ಹರಡಿ, ಹುಡಿ ನಗೆಗೂ ಅರ್ಥ ಹುಡುಕುವ ಚಿತ್ರದಾಸೆ
ಅದಕ್ಕೆ ಅವನೊಬ್ಬ ಹುಚ್ಚ! ಜಗದ ಕಣ್ಣಿಗೆ ಹುಚ್ಚ!!